ՀՀ-ում բնակարանային մատչելիության ապահովման ծրագրի առաջին շահառուները ստացել են վկայագրեր

Այսօր ԱՀ բնակարանային հարցերի կոմիտեի նախագահ Արմեն Մանգասարյանը վկայագրեր է հանձնել հիփոթեքային վարկավորման միջոցով Հայաստանի Հանրապետությունում բնակարան ձեռք բերելու նպատակով պետական աջակցության ծրագրի` 44-օրյա պատերազմի հետևանքով մի խումբ զոհված կամ անհայտ բացակայող անձանց ընտանիքների:

Շնորհակալություն հայտնելով զոհվածների հարազատներին համբերատար ծրագրի գործարկմանը սպասելու համար` Ա. Մանգասարյանը ներկայացրել է ծրագրի հետագա ընթացքը:

«Վկայագրեր ստանալուց հետո ընտանիքները բնակվարձի վճարման նպատակով տրամադրվող 40 000 դրամական աջակցությունը կստանան միայն առաջին երկու ամիսներին»,- նշել է կոմիտեի նախագահը` հավելելով, որ այդ աջակցությունից օգտվելու հնարավորությունից չզրկվելու համար ցանկալի է, որ հիփոթեքային վարկավորման ծրագրի շահառուները նախապես ունենան նախընտրելի բնակարան և միայն այդ դեպքում դիմեն ԱՀ բնակարանային հարցերի կոմիտե (հասցե` ք. Ստեփանակերտ, Սասունցի Դավիթ 2) կամ ԱՀ կառավարության օպերատիվ շտաբ (հասցե` ք. Երևան, Աբովյան 9)` առաջիկայում վկայագիր ստանալու համար:

Վկայագրերի հանձնման արարողությանը մասնակցել է ԱՀ կառավարության օպերատիվ շտաբի պետ Միքայել Վիրաբյանը: